TCS Nashik Row: નાસિકમાં સાત મહિલા પોલીસ અધિકારીઓએ મલ્ટિનૅશનલ કંપનીમાં જાતીય સતામણીના એક મોટા કેસનો પર્દાફાશ કર્યો; જાતીય સતામણીના કેસમાં કોર્ટે કંપનીના નાસિક ઓપરેશન્સ હેડની પોલીસ કસ્ટડી ૧૫ એપ્રિલ સુધી લંબાવી
પ્રતીકાત્મક ફાઇલ તસવીર
મહારાષ્ટ્ર (Maharashtra)ના નાસિક (Nashik)માં, સાત મહિલા પોલીસ અધિકારીઓની ટીમે જાતીય સતામણીના એક મોટા કેસનો સફળતાપૂર્વક પર્દાફાશ કર્યો છે. અહેવાલો અનુસાર, આ અધિકારીઓ શરૂઆતમાં ગુપ્ત રીતે ગયા અને નાસિકમાં એક બહુરાષ્ટ્રીય કંપની (multinational company) માં કામ કરવાનું શરૂ કર્યું. ત્યારબાદ, તેમણે મુખ્ય આરોપીને રંગે હાથે પકડી લીધો જ્યારે તે મહિલા કર્મચારીઓ સાથે અયોગ્ય વર્તન કરી રહ્યો હતો, જેના પરિણામે સંડોવાયેલા તમામ લોકોની ધરપકડ કરવામાં આવી છે.
40થી વધુ CCTV ફૂટેજની તપાસ કરી રહી છે પોલીસ
ADVERTISEMENT
મીડિયા રિપોર્ટ્સ અનુસાર, મીટિંગ દરમિયાન તેમની સાથે ગેરવર્તણૂક કરવામાં આવતી હતી. આ મામલે હાલ પોલીસ ૪૦થી વધુ CCTV ફૂટેજ ક્લિપ્સની તપાસ કરી રહી છે, જેથી આરોપીઓ વિરુદ્ધ મજબૂત પુરાવા મળી શકે. લોકોના જણાવ્યા અનુસાર, આ મલ્ટી-નેશનલ કંપનીમાં છેલ્લા ચાર વર્ષથી મહિલા કર્મચારીઓ સાથે જાતીય સતામણી કરવામાં આવી રહી હતી. આ સાથે જ તેમની ધાર્મિક લાગણીઓને ઠેસ પહોંચાડવાનું કામ પણ કરવામાં આવી રહ્યું હતું.
આ તમામ આરોપો હેઠળ અત્યાર સુધીમાં છ લોકો વિરુદ્ધ નવ કેસ નોંધવામાં આવ્યા છે, જેમાં એક ટીમ લીડર અને માનવ સંસાધન (HR) પ્રતિનિધિનો પણ સમાવેશ થાય છે. ફરિયાદ નોંધાવનાર મહિલાઓની ઉંમર સામાન્ય રીતે ૧૮ થી ૨૫ વર્ષની વચ્ચે હોવાનું કહેવાય છે.
અહેવાલ મુજબ, મામલો પ્રકાશમાં આવતાની સાથે જ કંપનીએ સાત કર્મચારીઓને નોકરીમાંથી કાઢી મૂક્યા છે. કંપનીએ એક નિવેદન પણ જાહેર કર્યું છે, જેમાં જણાવવામાં આવ્યું છે કે તેઓ પોલીસને પૂરો સહયોગ આપી રહ્યા છે.
કોર્ટે રિમાન્ડ ૧૫ એપ્રિલ સુધી લંબાવ્યા
નાસિક ઓફિસના ઓપરેશન્સ હેડને જાતીય સતામણીના કેસમાં વધુ બે દિવસની પોલીસ કસ્ટડીમાં રાખવાનો આદેશ આપવામાં આવ્યો છે, તેમ આસિસ્ટન્ટ પબ્લિક પ્રોસિક્યુટર કિરણ બેન્ડભર દ્વારા મંગળવારે જાહેર કરવામાં આવ્યું હતું.
અગાઉની સુનાવણી બાદ ત્રણ દિવસની પોલીસ કસ્ટડીમાં રહેલા આરોપીને મંગળવારે કોર્ટમાં રજૂ કરવામાં આવ્યા હતા. ચાલી રહેલી તપાસમાં થયેલી પ્રગતિને ટાંકતા, કોર્ટે આરોપીના રિમાન્ડ 15 એપ્રિલ, 2026 સુધી લંબાવ્યા છે.
કોર્ટની બહાર પત્રકારો સાથે વાત કરતા બેન્ડભર જણાવ્યું હતું કે, ‘આ એક ગંભીર બાબત છે જેમાં એક મહિલા પીડિતાની જાતીય સતામણી અને માનસિક સતામણીના આરોપો છે. તેમજ કાર્યસ્થળ પર આરોપી દ્વારા કથિત રીતે કરવામાં આવેલ અયોગ્ય વર્તનનો સમાવેશ થાય છે.’
POSH સમિતિના સભ્ય પર ઉત્પીડન કરનારને સાથ આપવાનો આરોપ
કાર્યસ્થળ પર સુરક્ષા પ્રોટોકોલના ગંભીર ઉલ્લંઘન સમાન આ કિસ્સામાં, ઓપરેશન્સ હેડ પોતે કંપનીની POSH (જાતીય સતામણી નિવારણ) સમિતિના સભ્ય હોવા છતાં પીડિતાની ફરિયાદ પર કોઈ પગલાં લેવામાં નિષ્ફળ રહ્યા હોવાનો આરોપ છે.
સરકારી પક્ષના જણાવ્યા અનુસાર, ફરિયાદની નોંધ લેવાને બદલે તેમણે કથિત રીતે ઉત્પીડન કરનાર આરોપીને ટેકો આપ્યો હતો.
કિરણ બેન્ડભરે જણાવ્યું હતું કે, ‘POSH સમિતિના સભ્ય હોવા છતાં, ઓપરેશન્સ હેડ પીડિતાની ફરિયાદની નોંધ લેવામાં નિષ્ફળ રહ્યા હતા અને તેના બદલે તેમણે આરોપીને સમર્થન આપ્યું હતું.’
નવ ગુના નોંધાયા, SITની રચના કરવામાં આવી
આ મામલો હવે નોંધપાત્ર રીતે વકર્યો છે અને આ પ્રકરણમાં અત્યાર સુધીમાં નવ અલગ-અલગ ગુનાઓ નોંધવામાં આવ્યા છે. આરોપોની ગંભીરતા અને જટિલતાને ધ્યાનમાં રાખીને, સત્તાવાળાઓએ કાર્યસ્થળ પરના આ સતામણી કૌભાંડની ઊંડી તપાસ કરવા માટે એક સ્પેશિયલ ઇન્વેસ્ટિગેશન ટીમ (SIT)ની રચના કરી છે.
તપાસ દરમિયાન સતામણીના મૂળ આરોપો અને વરિષ્ઠ મેનેજમેન્ટ દ્વારા તેને છુપાવવાના કથિત પ્રયાસો, એમ બંને પાસાઓની તપાસ કરવામાં આવી રહી છે. આમાં POSH સમિતિ દ્વારા તેની નિર્ધારિત ફરજો બજાવવામાં આવેલી નિષ્ફળતાનો પણ સમાવેશ થાય છે.
