આજે મધ્ય પ્રદેશમાં ૨૦૦૦ એકરના ટેક્સટાઇલ પાર્કનું ભૂમિપૂજન કરશે નરેન્દ્ર મોદી

આ પાર્ક પ્રધાનમંત્રી મેગા ઇન્ટિગ્રેટેડ ટેક્સટાઇલ રીજન ઍન્ડ અપૅરલ (PM MITRA) યોજનાનો એક ભાગ છે.

નરેન્દ્ર મોદી

વડા પ્રધાન નરેન્દ્ર મોદીની આજે ૭૫મી વર્ષગાંઠ છે અને તેઓ આજે મધ્ય પ્રદેશના ધાર જિલ્લાના ભૈંસોલામાં PM MITRA ટેક્સટાઇલ પાર્કનું ભૂમિપૂજન કરવાના છે. આ પ્રોજેક્ટ હેઠળ ૨૦,૦૦૦ કરોડ રૂપિયાનું રોકાણ થવાનું છે. આ પ્રોજેક્ટથી માલવા અને નિમારમાં સહિયારી ઔદ્યોગિક ક્રાન્તિની શરૂઆત થશે. આ પાર્ક ભારતના કાપડ ઉદ્યોગને નવી ઊંચાઈઓ પર લઈ જશે એટલું જ નહીં, કપાસ-ઉત્પાદક ખેડૂતો, યુવાનો, મહિલાઓ અને કામદારો માટે રોજગારના નવા દરવાજા પણ ખોલશે. 

મુખ્ય પ્રધાન ડૉ. મોહન યાદવના નેતૃત્વમાં આ પ્રોજેક્ટને નક્કર આકાર આપવા માટે છેલ્લાં બે વર્ષથી જોરશોરથી કામ ચાલી રહ્યું છે. આ પાર્ક ‘ફાર્મ ટુ ફાઇબર, ફૅક્ટરી ટુ ફૅશન અને ફૉરેન’ની વિભાવનાને સાકાર કરશે. એનાથી મધ્ય પ્રદેશ વૈશ્વિક ટેક્સટાઇલ હબ તરીકે ઊભરી આવશે. 

ADVERTISEMENT

આ પાર્ક પ્રધાનમંત્રી મેગા ઇન્ટિગ્રેટેડ ટેક્સટાઇલ રીજન ઍન્ડ અપૅરલ (PM MITRA) યોજનાનો એક ભાગ છે. એનો ઉદ્દેશ ભારતને કાપડઉદ્યોગમાં વૈશ્વિક લીડર બનાવવાનો છે. લગભગ ૨૦૦૦ એકરમાં ફેલાયેલો આ પાર્ક માલવા અને નિમારની સાંસ્કૃતિક, કૃષિ અને ઔદ્યોગિક શક્તિઓને એક પ્લૅટફૉર્મ પર લાવશે.