`શું આપણને ચોથા પક્ષના ઓડિટની જરૂર છે?` જાહેર પ્રોજેક્ટ્સ અંગે પીએમ મોદીનો ઠપકો

PM Narendra Modi questions need for 4th-party audit: ૫૩મી `પ્રગતિ` બેઠકની અધ્યક્ષતા કરતી વખતે પ્રધાનમંત્રી નરેન્દ્ર મોદીએ જાહેર ઈન્ફ્રાસ્ટ્રક્ચર પ્રોજેક્ટ્સમાં ગુણવત્તાની ખામીઓ અંગે કેન્દ્રીય અને રાજ્યના ઉચ્ચ અમલદારોની આકરી ટીકા કરી

વડાપ્રધાન નરેન્દ્ર મોદીની ફાઇલ તસવીર

પ્રધાનમંત્રી નરેન્દ્ર મોદી (Narendra Modi)એ જાહેર ઈન્ફ્રાસ્ટ્રક્ચર નિર્માણમાં વારંવાર સામે આવતી ગુણવત્તાની ખામીઓ સામે ભારે નારાજગી વ્યક્ત કરી છે અને ઉચ્ચ અમલદારોને સવાલ કર્યો છે કે શું સરકારે હવે "ચોથા પક્ષના ઓડિટ" (4th-Party Audit)ની વ્યવસ્થા દાખલ કરવી પડશે. ૫૩મી માસિક પ્રગતિ (PRAGATI) બેઠકની અધ્યક્ષતા કરતી વખતે પ્રધાનમંત્રીએ કેન્દ્રીય સચિવો અને રાજ્યના મુખ્ય સચિવોને કડક સંદેશ આપતાં સ્પષ્ટ કર્યું હતું કે, રાષ્ટ્રીય વિકાસ કાર્યોમાં નબળી ગુણવત્તાનું કામ બિલકુલ ચલાવી લેવાશે નહીં.

વર્તમાન ઓડિટ સિસ્ટમની અસરકારકતા સામે પીએમ મોદીના સવાલો

ADVERTISEMENT

જાહેર ક્ષેત્રના પ્રોજેક્ટ્સમાં થર્ડ-પાર્ટી ક્વોલિટી ઓડિટ પહેલેથી જ ફરજિયાત હોવાનું રેખાંકિત કરતાં પ્રધાનમંત્રી મોદીએ નોંધ્યું હતું કે વર્તમાન દેખરેખ પ્રણાલી અપેક્ષિત ધોરણો જાળવવામાં નિષ્ફળ રહી હોય તેમ લાગે છે. તેમણે પ્રશ્ન કર્યો હતો કે બહુસ્તરીય તપાસ પ્રક્રિયાઓ હોવા છતાં મોટા ઈન્ફ્રાસ્ટ્રક્ચર પ્રોજેક્ટ્સમાં ખામીઓ અને નબળી ગુણવત્તા કેમ સામે (PM Narendra Modi questions need for 4th-party audit) આવી રહી છે.

કામની ઝડપની સાથે ગુણવત્તામાં કોઈ સમાધાન ન થવું જોઈએ તેના પર ભાર મૂકતાં પ્રધાનમંત્રીએ મંત્રાલયો, રાજ્ય વહીવટીતંત્રો અને પ્રોજેક્ટ અમલીકરણ એજન્સીઓને આધુનિક ટેકનોલોજીનો ઉપયોગ કરવાની સૂચના આપી હતી. તેમણે અધિકારીઓને બાંધકામના દરેક તબક્કે ગુણવત્તાની ખાતરી કરવાની પદ્ધતિઓને વધુ મજબૂત કરવા અને કડક વહીવટી દેખરેખ રાખવાનો આદેશ આપ્યો હતો.

૩૦,૦૦૦ કરોડના ઈન્ફ્રાસ્ટ્રક્ચર પ્રોજેક્ટ્સની વ્યાપક સમીક્ષા

પ્રગતિ બેઠક દરમિયાન પ્રધાનમંત્રી મોદીએ ૯ રાજ્યોમાં ફેલાયેલા રુપિયા ૩૦,૦૦૦ કરોડથી વધુના ખર્ચ ધરાવતા ૬ મુખ્ય ઈન્ફ્રાસ્ટ્રક્ચર પ્રોજેક્ટ્સની સમીક્ષા કરી હતી. આ મૂલ્યાંકનમાં રેલવે, માર્ગ વ્યવહાર અને પાવર ટ્રાન્સમિશન જેવા મહત્વના ક્ષેત્રોના પ્રોજેક્ટ્સ સામેલ હતા.

અમલદારોને સંબોધતાં પ્રધાનમંત્રીએ જણાવ્યું હતું કે, ઈન્ફ્રાસ્ટ્રક્ચર વિકાસને નાના-મોટા ટુકડાઓ કે અલગ ભાગો તરીકે જોવાના બદલે સમગ્ર પ્રોજેક્ટ તરીકે મોનિટર અને પૂર્ણ કરવો જોઈએ. પાવર સેક્ટરની સમીક્ષા કરતી વખતે તેમણે નોંધ્યું હતું કે યોગ્ય ટ્રાન્સમિશન માળખા વિના વીજ ઉત્પાદન ક્ષમતા વધારવી એ કેનાલ નેટવર્ક વગર ડેમ બનાવવા જેવું નિરર્થક છે.

સાયબર ફ્રોડ અને ડિજિટલ પહેલ પર વિશેષ ધ્યાન

ભૌતિક ઈન્ફ્રાસ્ટ્રક્ચર ઉપરાંત, પ્રગતિ બેઠકમાં સાયબર ફ્રોડ અને "ડિજિટલ એરેસ્ટ" જેવા ઉભરતા જાહેર પડકારોની પણ સમીક્ષા કરવામાં આવી હતી. ૨૦ રાજ્યોમાં લેવાયેલા અટકાયતી પગલાં અંગે કેન્દ્રીય ગૃહ સચિવ ગોવિંદ મોહનના વિગતવાર પ્રેઝન્ટેશન પછી, પ્રધાનમંત્રીએ જાહેર જાગૃતિ, શિક્ષણ અને સંસ્થાકીય પ્રતિભાવ પ્રણાલીને મજબૂત કરવા પર ભાર મૂક્યો હતો. તેમણે ખાસ કરીને વરિષ્ઠ નાગરિકો અને યુવાનોને નવી સાયબર છેતરપિંડીની પદ્ધતિઓ અને સુરક્ષિત ડિજિટલ પ્રથાઓથી વાકેફ કરવા માટે સતત જાગૃતિ અભિયાન ચલાવવાનું આહ્વાન કર્યું હતું.

આ ઉપરાંત, બેઠકમાં ડિજિટલ એગ્રીકલ્ચર મિશનના `એગ્રીસ્ટેક` (AgriStack) પ્લેટફોર્મ હેઠળ થયેલી પ્રગતિનું મૂલ્યાંકન કરવામાં આવ્યું હતું. પ્રધાનમંત્રી મોદીએ અધિકારીઓને ખેતરના આયોજનથી લઈને લણણી પછીના પ્રક્રિયા સુધીના કૃષિ ડેટા મેનેજમેન્ટને સરળ બનાવવા માટે આર્ટિફિશિયલ ઈન્ટેલિજન્સ (AI) અને આધુનિક ડિજિટલ ટેકનોલોજીનો ઉપયોગ કરવા વિનંતી કરી હતી, જેથી સરકારી યોજનાઓના લાભો સીધા ખેડૂતો સુધી પહોંચાડી શકાય.