નિદાન માટે એક્સ-રે કાઢવામાં આવ્યો તો ખબર પડી કે તેના પેટમાં ૧૦૦ ગ્રામનું સોનાનું બિસ્કિટ છે. એ પછી દીકરાએ કહ્યું કે થોડા દિવસ પહેલાં તે રમત-રમતમાં સોનાનું બિસ્કિટ ગળી ગયેલો જે હજી તેના પેટમાંથી નીકળ્યું નથી
એક્સ-રે
ચીનના સુઝોઉ શહેરમાં કીઆન અટક ધરાવતા ૧૧ વર્ષના છોકરાને પેટમાં ખૂબ દુખાવો ઊપડ્યો હતો. તેનું પેટ ફૂલી ગયું હતું. તરત જ તેના પેરન્ટ્સ દીકરાને લઈને ચિલ્ડ્રન્સ હૉસ્પિટલ પહોંચ્યા હતા. ત્યાં ડૉક્ટરોને પહેલાં તો પેટ ફૂલવાનું કારણ સમજાયું નહીં. નિદાન માટે એક્સ-રે કાઢવામાં આવ્યો તો ખબર પડી કે તેના પેટમાં ૧૦૦ ગ્રામનું સોનાનું બિસ્કિટ છે. એ પછી દીકરાએ કહ્યું કે થોડા દિવસ પહેલાં તે રમત-રમતમાં સોનાનું બિસ્કિટ ગળી ગયેલો જે હજી તેના પેટમાંથી નીકળ્યું નથી.
ADVERTISEMENT
શરૂઆતમાં તો ડૉક્ટરોએ વિચાર્યું કે રેચક દવાઓ આપીને જુલાબ કરાવીને જ સોનાનું બિસ્કિટ પેટમાંથી નીકળે એની રાહ જોઈએ. બે દિવસ હેવી રેચક દવાઓ આપી હોવા છતાં ગોલ્ડ બાર નીકળ્યો નહીં એટલે ફરી એક્સ-રે કઢાવ્યો. ગોલ્ડ બાર પહેલાં જે જગ્યાએ હતો ત્યાં જ ફસાઈ ગયો હોવાથી સર્જરી સિવાય બીજો કોઈ વિકલ્પ રહ્યો નહોતો. બે સર્જ્યનોએ અડધો કલાકની સર્જરી કરીને ગોલ્ડ બાર કાઢી લીધો અને હવે છોકરો નૉર્મલ છે.
