અફઘાનિસ્તાન સામે ભારતની ક્લીન સ્વીપ

શુભમન ગિલની આગેવાનીમાં ભારતે પહેલી વન-ડે સિરીઝ જીતીને ક્લીન સ્વીપ પણ નોંધાવી છે. અફઘાનિસ્તાન સામેની પહેલવહેલી વન-ડે સિરીઝમાં ક્લીન સ્વીપ કરતાં પહેલાં ભારતે વર્ષ ૨૦૨૪માં T20 સિરીઝમાં પણ ૩-૦થી અફઘાનિસ્તાનનાં સૂપડાં સાફ કર્યાં હતાં. અફઘાનિસ્તાન ફુલ-મેમ્બર ટીમોમાંથી માત્ર ભારતને છેલ્લી ૧૮ ઇન્ટરનૅશનલ મૅચથી હરાવી નથી શક્યું. 

અફઘાને ૪૪.૨ ઓવરમાં ઑલઆઉટ થઈને ૨૧૮ રન કર્યા હતા. જવાબમાં ભારતે ૨૮.૪ ઓવરમાં એક વિકેટે ૨૨૪ રન કરીને ૨૧૯ રનનો ટાર્ગેટ ચેઝ કર્યો હતો. ૨૩૮ રન ફટકારીને કૅપ્ટન શુભમન ગિલ પ્લેયર ઑફ ધ સિરીઝ પણ બન્યો હતો. 

અફઘાનિસ્તાનના કૅપ્ટન હશમતુલ્લાહ શાહિદીએ ૧૩૧ બૉલમાં ૧૩ ફોર અને એક સિક્સની મદદથી ૧૦૨ રન કરીને પહેલવહેલી વન-ડે સદી નોંધાવી હતી. ઑલરાઉન્ડર અઝમતુલ્લા ઓમરઝાઈએ ૫૬ બૉલમાં ૫૦ રન કર્યા હતા. પ્રસિદ્ધ ક્રિષ્નાએ ૮.૨ ઓવરમાં ૨૩ રન આપીને પાવરપ્લેની ચાર વિકેટ સહિત પહેલી વખત વન-ડેમાં પાંચ વિકેટ લીધી હતી. ગુરનૂર બરાડ, પ્રિન્સ યાદવ અને હર્ષ દુબેએ ૧-૧ વિકેટ લીધી હતી. 

રન-ચેઝ દરમ્યાન ભારતીય ઓપનર્સે ૨૨.૫ ઓવરમાં ૧૭૦ રનની ભાગીદારી કરીને જીત સુનિશ્ચિત કરી હતી. યશસ્વી જાયસવાલે ૧૪ ફોર અને ત્રણ સિક્સના આધારે ૮૬ બૉલમાં અણનમ ૧૧૦ રન કર્યા હતા. રોહિત શર્માએ ૬૯ બૉલમાં નવ ફોર અને ત્રણ સિક્સના આધારે ૭૯ રન કર્યા હતા. 

કૅપ્ટન શુભમન ગિલના બદલે ત્રીજા ક્રમે બૅટિંગ કરીને વાઇસ-કૅપ્ટન શ્રેયસ ઐયરે ૧૯ બૉલમાં બે સિક્સની મદદથી અણનમ ૨૦ રન નોંધાવ્યા હતા. અફઘાનિસ્તાન તરફથી સ્પિનર મોહમ્મદ નબીને એક સફળતા મળી હતી. 

ભારતની બૅટિંગ પાંચ રનના સ્કોરથી કેમ શરૂ થઈ ?

અફઘાનિસ્તાનની બૅટિંગ સમયે કૅપ્ટન હશમતુલ્લાહ શાહિદી ૪૦મી ઓવરમાં વારંવાર પિચના ડેન્જર એરિયા પર દોડ્યો હોવાથી પાંચ રનની પેનલ્ટી મળી હતી. એના કારણે ભારતની બૅટિંગ પાંચ રનના સ્કોરથી શરૂ થઈ હતી. ભારતીય ઓપનર્સે પહેલી ઓવરમાં ૨૩ રન નોંધાવ્યા હતા.

પ્રસિદ્ધ ક્રિષ્નાની બોલિંગ પર રોહિત શર્માએ ત્રણ કૅચ પકડ્યા

૭.૨ ઓવરમાં ફાસ્ટ બોલર પ્રસિદ્ધ ક્રિષ્નાની ધારદાર બોલિંગને કારણે અફઘાનિસ્તાને ૨૮ રનના સ્કોર પર ત્રણ વિકેટ ગુમાવી હતી. પ્રસિદ્ધ ક્રિષ્નાની ઓવરમાં રોહિત શર્માએ ટૉપ-ઑર્ડર બૅટર્સ ઇબ્રાહિમ ઝાદરાન, રહમત શાહ અને રહમાનુલ્લા ગુરબાઝના કૅચ પકડ્યા હતા.