સૈયદ મુશ્તાક અલી ટ્રોફી ટુર્નામેન્ટનો યંગેસ્ટ સેન્ચુરિયન હવે વૈભવ સૂર્યવંશી

બિહારના વન્ડર બૉયે ૬૧ બૉલમાં ૧૦૮ રન કર્યા, પણ મહારાષ્ટ્રના પૃથ્વી શૉએ ૩૦ બૉલમાં ૬૬ રન કરીને જીત છીનવી લીધી

વૈભવ સૂર્યવંશીએ સદીની શાનદાર ઉજવણી કરી

કલકત્તાના ઈડન ગાર્ડન્સમાં ગઈ કાલે બિહાર અને મહારાષ્ટ્ર વચ્ચે સૈયદ મુશ્તાક અલી ટ્રોફીની રોમાંચક મૅચ રમાઈ હતી. ઓપનર વૈભવ સૂર્યવંશીએ ૬૧ બૉલમાં ૭-૭ ફોર અને સિક્સરની મદદથી ૧૦૮ રનની અણનમ ઇનિંગ્સ રમીને ટીમનો સ્કોર ૧૭૬-૩ સુધી પહોંચાડ્યો હતો. જોકે મહારાષ્ટ્રના સ્ટૅન્ડ-ઇન કૅપ્ટન પૃથ્વી શૉએ ૩૦ બૉલમાં ૧૧ ફોર અને એક સિક્સરના આધારે ૬૬ રન કરીને ટીમને રનચેઝમાં મદદ કરી હતી. મહારાષ્ટ્રે ૧૯.૧ ઓવરમાં ૭ વિકેટે ૧૮૨ રન કરીને ૧૭૭ રનનો ટાર્ગેટ સરળતાથી ચેઝ કર્યો હતો.

બિહારના આ ક્રિકેટરે ૧૨ વર્ષ જૂનો આ રેકૉર્ડ તોડ્યો

ADVERTISEMENT

સૈયદ મુશ્તાક અલી ટ્રોફી T20 ટુર્નામેન્ટના ઇતિહાસમાં ૧૪ વર્ષ ૨૫૦ દિવસની ઉંમરે સદી ફટકારનાર વૈભવ સૂર્યવંશી યંગેસ્ટ ક્રિકેટર બની ગયો છે. આ પહેલાં મહારાષ્ટ્રના વિજય ઝોલે ૧૮ વર્ષ અને ૧૧૮ દિવસની ઉંમરે ૨૦૧૩માં મુંબઈ સામે ૧૦૯ રન બનાવીને આ રેકૉર્ડ કર્યો હતો. વૈભવે ૧૬ T20 ઇનિંગ્સમાં ૩ સદી અને એક ફિફ્ટીના આધારે ૬૪૪ રન કર્યા છે. તેણે ૨૦૯.૭૭ના સ્ટ્રાઇક-રેટથી બૅટિંગ કરીને ૪૭ ફોર અને ૫૮ સિક્સર પણ ફટકારી છે. સૈયદ મુશ્તાક અલી ટ્રોફીની પહેલી ૩ ઇનિંગ્સમાં તે ૧૪, ૧૩ અને પાંચ રનના સ્કોર પર આઉટ થયો હતો. 

3

આટલી T20 સદી ફટકારનાર પહેલો ટીનેજ ક્રિકેટર બન્યો વૈભવ સૂર્યવંશી.