જૂની વસ્તુઓને આપો નવો અને સ્ટાઇલિશ લુક

આજના ફાસ્ટ ફૅશનના જમાનામાં આપણે અવારનવાર નવાં કપડાં અને ઍક્સેસરીઝ ખરીદતા રહીએ છીએ, જેના કારણે પર્યાવરણ પર મોટું દબાણ આવે છે. પરંતુ શું તમે જાણો છો કે ફૅશનેબલ દેખાવા માટે હંમેશાં નવી વસ્તુઓ ખરીદવી જરૂરી નથી? ઝીરો વેસ્ટ ફૅશન એક એવો કન્સેપ્ટ છે જે આપણને ઘરમાં પડેલી જૂની કે બિનઉપયોગી વસ્તુઓને ફરીથી વાપરીને સ્ટાઇલિશ દેખાવાની તક આપે છે. ચાલો જાણીએ કે કેવી રીતે તમે તમારી ઍક્સેસરીઝમાં ઝીરો વેસ્ટ અભિગમ અપનાવી શકો છો.

 

૧ સ્કાર્ફ અને દુપટ્ટાનો ઉપયોગ

આપણા કબાટમાં એવા ઘણા રેશમી સ્કાર્ફ કે જૂના દુપટ્ટા હોય છે જેનો આપણે ભાગ્યે જ ઉપયોગ કરીએ છીએ. ઝીરો વેસ્ટ સ્ટાઇલિંગમાં આ સૌથી ઉપયોગી વસ્તુ છે.

હૅન્ડબૅગ ઍક્સેસરી : તમારી સાદી હૅન્ડબૅગના હૅન્ડલ પર રંગબેરંગી રેશમી સ્કાર્ફ લપેટી દો. આનાથી તમારી બૅગને તરત જ એક એક્સપેન્સિવ અને ડિઝાઇનર લુક મળશે.

હેર ઍક્સેસરી : જૂના સ્કાર્ફને હેરબૅન્ડ તરીકે અથવા ચોટલામાં ગૂંથીને વાપરો. એ બોહેમિયન અને વિન્ટેજ લુક આપે છે.
બેલ્ટ તરીકે ઉપયોગ : જીન્સ કે વનપીસ ડ્રેસ પર ચામડાના બેલ્ટને બદલે સિલ્કનો દુપટ્ટો કમર પર બાંધો. આ એક યુનિક ફૅશન સ્ટેટમેન્ટ બનશે.

૨ જૂના દાગીનાનું નવું સર્જન 
ઘણી વાર ઇમિટેશન જ્વેલરીમાં એક બુટ્ટી ખોવાઈ જાય છે અથવા હાર તૂટી જાય છે. એને ફેંકી દેવાને બદલે તમે એનો આ રીતે ઉપયોગ કરી શકો. 
બ્રોચ બનાવો : તૂટેલા હારના પેન્ડન્ટ કે મોટી બુટ્ટીને તમારી કુરતી, જૅકેટ કે સાડીના પલ્લુ પર પિન તરીકે લગાવો.
લેયરિંગ : જૂની અલગ-અલગ ચેઇનને ભેગી કરીને લેયર્ડ નેકલેસ બનાવો. અત્યારે વેસ્ટર્ન અને એથનિક બન્નેમાં લેયરિંગ ખૂબ ટ્રેન્ડમાં છે.

૩. ફૅબ્રિક જ્વેલરી
જો તમારી પાસે કપડાં સિવડાવ્યા પછી વધેલા ટુકડા હોય તો એમાંથી સુંદર ઘરેણાં બનાવી શકાય છે.
કાપડનાં ઇઅરરિંગ્સ : પૂંઠાના ગોળ ટુકડા પર કાપડ વીંટાળીને એના પર મણકા કે ટિક્કી લગાવીને સુંદર ઇઅરરિંગ્સ બનાવી શકાય.
ચોકર નેકલેસ : મખમલ કે સિલ્કના કાપડની પટ્ટીને ગળામાં બાંધીને એને ચોકર તરીકે વાપરો.

૪. ઇકો-ફ્રેન્ડ્લી સ્લિંગ-બૅગ
જૂના ડેનિમ જીન્સ કે જૂની જૂટની થેલીઓમાંથી ક્લચ કે નાની સ્લિંગ-બૅગ બનાવી શકાય છે. ડેનિમ એક એવું મટીરિયલ છે જે ક્યારેય ફૅશન બહાર જતું નથી અને એ ખૂબ મજબૂત પણ હોય છે. એને થોડા પૅચવર્ક કે એમ્બ્રૉઇડરીથી નવો લુક આપી શકાય છે.

૫. બટન અને મણકાનો જાદુ
કપડાંમાંથી નીકળી ગયેલા બટન કે જૂની માળાના મણકાને ભેગા કરીને તમે બ્રેસલેટ અથવા હેરપિન શણગારી શકો છો. સાદા વાઇટ શર્ટના કૉલર પર અલગ-અલગ રંગનાં બટન ટાંકીને એને હાઈ ફૅશન લુક આપી શકાય છે.

  જ્યારે આપણે વસ્તુઓને રીસાઇકલ કરીએ છીએ ત્યારે આપણે માત્ર પૈસા જ નથી બચાવતા, પણ લૅન્ડફિલમાં જતો કચરો પણ ઘટાડીએ છીએ. ઝીરો વેસ્ટ ઍક્સેસરીઝ તમારી ક્રીએટિવિટી દર્શાવે છે અને તમને ભીડથી અલગ પાડે છે, કારણ કે તમે જે ઍક્સેસરી પહેરી છે એ દુનિયામાં માત્ર તમારી પાસે જ છે.